बुटवल । पूर्वराष्ट्रपति विद्यादेवी भण्डारी पक्षमा खुल्ला समर्थन जनाएका कारण राष्ट्रिय युवा संघ नेपाल, लुम्बिनी प्रदेश अध्यक्ष सुरज खरेल एक वर्षका लागि निलम्बनमा परेका छन्।

राष्ट्रिय युवा संघ नेपालको साउन ९ गते बसेको पदाधिकारी बैठकले खरेललाई संगठनको सम्पूर्ण जिम्मेवारीबाट पदमुक्त गर्दै, एक वर्षसम्म संगठनबाट निलम्बन गर्ने निर्णय गरेको हो।

निलम्बनसम्बन्धी निर्णय पत्र महासचिव रमेश चौलागाईंद्वारा जारी गरिएको हो, जसमा खरेलमाथि संगठनविरुद्ध अराजक र गैरजिम्मेवार गतिविधिमा संलग्न रहेको आरोप लगाइएको छ।

पार्टी नेतृत्वविरुद्ध अभिव्यक्ति र अनुशासन उल्लंघन

रुपन्देहीको देवदह नगरपालिका निवासी खरेलले सामाजिक सञ्जालमार्फत् पार्टी नेतृत्व विशेषतः एमाले अध्यक्ष केपी ओलीविरुद्ध परिवर्तनको माग गरेका थिए। उनले केही हप्ताअघि ओलीसँगको तस्वीरसहित फेसबुक स्टाटस लेख्दै,

“अब मार्गप्रशस्त तपाईंले गर्नुपर्छ, जनता बोलिरहेका छन्, सुन्नुहोस्।”
भनी नेतृत्व परिवर्तनको माग राखेका थिए।

साथै, पोखरामा सम्पन्न १०औं राष्ट्रिय महाधिवेशनको सन्दर्भमा केन्द्रबाट स्पष्टीकरण सोधिएपछि खरेलले इमेलमार्फत् तीन पृष्ठ लामो जवाफ पठाएका थिए। तर पार्टीले त्यो जवाफलाई अस्वीकार्य र गैर-जिम्मेवार ठहर गरेको छ।

खरेलविरुद्धको आरोप विवरण:

अध्यक्ष मण्डलका सदस्यहरूमाथि अशिष्ट र अभद्र व्यवहार। प्रतिनिधिहरूलाई धम्कीपूर्ण व्यवहार। सामाजिक सञ्जालमार्फत पार्टी नेतृत्वमाथि लाञ्छना लगाउने र मानहानी गर्ने। केन्द्रीय निर्देशनको अवज्ञा गर्दै स्वेच्छाचारी ढंगले प्रदेश सचिवालय बैठक सञ्चालन। संघको विधान २०४७ को धारा ४१ र ४२ (क) र (ख) अनुसार कारबाही अघि बढाइएको हो, जुन १०औं महाधिवेशन २०८२ जेठ ९–११ मा पोखरामा संशोधन गरिएको थियो।

स्पष्टीकरणमा खरेलको भनाइ

खरेलले इमेलमार्फत् पठाएको स्पष्टीकरणमा आफूमाथि लगाइएको सबै आरोप अस्वीकार गर्दै लेखेका छन्:

“संगठनलाई बलियो बनाउन नेतृत्वको विकल्पको प्रस्ताव गर्नु कुनै अपराध होइन।”
उनले महाधिवेशनमा सुमन पुरीलाई समर्थन गरेको बताए, तर कसैप्रति अपमानजनक व्यवहार नगरेको दाबी गरे।

उनको भनाइमा,

“म अधिवेशनबाट निर्वाचित भएको अध्यक्ष हुँ, मलाई हटाउन अर्को अधिवेशन चाहिन्छ। निलम्बनको निर्णय अन्यायपूर्ण र पूर्वाग्रही हो।”
साथै उनले क्रियाशील रूपमा संगठनमा रहने, आवश्यक परे समानान्तर कमिटी गठनको पनि संकेत दिएका छन्।

सुरज खरेल देवदह नगरपालिकाका मेयर ध्रुव खरेलका पुत्र हुन्। सन् २०८० मा सम्पन्न प्रदेश अधिवेशनमा उनी सर्वसम्मत रूपमा लुम्बिनी अध्यक्षमा निर्वाचित भएका थिए।उनको सामाजिक सञ्जालमा सक्रियता र विचार प्रदर्शनले उनलाई राष्ट्रिय चर्चाको केन्द्रमा ल्याएको थियो। तर पार्टी नेतृत्वले उक्त क्रियाकलापलाई अनुशासन विपरीत ठहर गर्दै कारबाही अघि बढाएको हो।सुरज खरेलको निलम्बन एमाले पार्टी भित्रको आन्तरिक राजनीति र अनुशासन परीक्षणको एउटा उदाहरण हो। सामाजिक सञ्जालमा व्यक्त विचार, आन्तरिक बहस, र नेतृत्व आलोचना कति हदसम्म संस्थागत रूपमा स्वीकार्य हुन्छ भन्ने प्रश्न उठेको छ। साथै, युवा नेताहरूको स्वतन्त्र अभिव्यक्तिमाथिको नियन्त्रण र त्यसप्रति पार्टीको प्रतिक्रिया भविष्यमा एमालेजस्ता दलहरूको लोकतान्त्रिक मूल्यप्रतिको नीतिगत दृष्टिकोण प्रस्ट पार्नेछ।