विराटनगर — सर्वोच्च अदालतका न्यायाधीश, कानुन व्यवसायी र सञ्चारकर्मीहरूमाथि फेक अडियो तयार गरी बदनाम गर्ने ‘डार्क फाइल’ प्रकरणमा दोषी ठहर भइसकेका राजकुमार तिम्सिना पक्राउ परेका छन्।

सर्वोच्च अदालतबाट ६ महिनाको कैद सजाय सुनाइएका तिम्सिनालाई आइतबार इटहरीबाट पक्राउ गरिएको प्रहरीले जनाएको छ। अदालतको फैसला आएपछि उनी फरार रहेका थिए।

पक्राऊको पृष्ठभूमि
इलाका प्रहरी कार्यालय इटहरीका डीएसपी लक्ष्मी भण्डारीका अनुसार इटहरी–५ पचरुकीमा दुई महिलाबीच भएको लेनदेन विवादको घटनास्थलमा प्रहरी पुगेपछि तिम्सिनालाई पनि त्यहाँ भेटिएको थियो। सो विवादमा तिम्सिनाको संलग्नता देखिएपछि प्रहरीले उनलाई नियन्त्रणमा लिएको थियो।

पहिचान लुकाउन प्रयास
प्रारम्भमा तिम्सिनाले आफ्नो नाम र ठेगाना लुकाउने प्रयास गरेका थिए। उनले आफू इलाम निवासी ‘खड्का’ थर भएको दाबी गरेका थिए। तर, प्रहरीद्वारा मागिएको परिचय पत्र जाँच गर्दा उनी फरार अभियुक्त राजकुमार तिम्सिना भएको पुष्टि भएको डीएसपी भण्डारीले बताए।

फैसला कार्यान्वयनको तयारी
सर्वोच्च अदालतको गत असोज १४ गतेको पूर्ण इजलासको फैसलाअनुसार तिम्सिनालाई ६ महिना कैदको सजाय सुनाइएको थियो। अहिले उनलाई फैसला कार्यान्वयनका लागि कारागार पठाउने तयारी भइरहेको प्रहरीले जनाएको छ।

फरार रहँदाको गतिविधि
तिम्सिना ललितपुरको गोदावरी–१० निवासी हुन्। बयान अनुसार उनी पछिल्लो समय धनकुटामा बसेर काठको काम गर्दै आएका थिए।