काठमाडौं महानगरपालिका अन्तर्गतका सामुदायिक विद्यालयहरूबाट यस वर्षको माध्यमिक शिक्षा परीक्षा (एसईई) मा सहभागी भएका विद्यार्थीहरूमध्ये ७८९ जनाले ३.६१ देखि ४.० सम्मको ग्रेड प्राप्त गरेका छन्। तीमध्ये १७ जना विद्यार्थीले उच्चतम ४.० जीपीए ल्याउन सफल भएका छन्।

महानगरले विगत केही वर्षदेखि शिक्षा क्षेत्रमा विशेष प्राथमिकता दिँदै आएको छ। त्यसकै परिणामस्वरूप यसपटक सामुदायिक विद्यालयहरूबाट उत्कृष्ट नतिजा देखिएको काठमाडौं महानगरपालिका शिक्षा विभागले जनाएको छ। विभागका अनुसार सामुदायिक विद्यालयहरूमा गुणस्तरीय शिक्षाको पहुँच विस्तार, अनुभवी शिक्षकहरूको परिचालन र अध्ययन वातावरणमा सुधार गर्दै आएको नीतिका कारण यो उपलब्धि सम्भव भएको हो।

काठमाडौं सामुदायिक विद्यालयको एसईई सुधारमा  वर्गीय प्रगति

एसईईमा ३.६१ देखि ४.० जीपीए ल्याउने विद्यार्थी संख्या ७८९ हुनु आफैमा सामुदायिक विद्यालयतर्फको आकर्षणमा सकारात्मक परिवर्तन देखिएको मानिन्छ। यसअघिका वर्षहरूमा यसस्तरको नतिजा सामुदायिक विद्यालयमा निकै दुर्लभ थियो। शिक्षाविद्हरूका अनुसार सरकारी विद्यालयहरूमा समयमै पाठ्यक्रम सकिने, आन्तरिक मूल्याङ्कन प्रणाली सुधार र प्राविधिक शिक्षामा जोड दिँदा नतिजामा गुणात्मक सुधार आएको हो।

काठमाडौं महानगरपालिकाले आगामी वर्षहरूमा पनि सामुदायिक विद्यालयमा प्रविधिको प्रयोग, शिक्षक प्रशिक्षण, र विद्यार्थीका लागि अतिरिक्त शैक्षिक कार्यक्रममार्फत गुणस्तरमा थप वृद्धि गर्ने लक्ष्य लिएको छ।

यस उपलब्धिबाट सामुदायिक विद्यालयप्रति आम अभिभावक र विद्यार्थीको विश्वास बढ्ने आशा गरिएको छ। साथै, निजी विद्यालयहरूसँग प्रतिस्पर्धा गर्न सक्ने क्षमताको विकास हुँदै गएको संकेत समेत यो नतिजाबाट मिलेको छ।