बुटवल । प्रतिनिधि सभा सदस्य दिवंगत दीपक बोहराको निधनपछि रिक्त बनेको रुपन्देही निर्वाचन क्षेत्र नम्बर–३ मा उपनिर्वाचनको तयारीसँगै प्रमुख राजनीतिक दलहरूमा उम्मेदवार चयनको दौड तीव्र बन्दै गएको छ। निर्वाचन आयोगले कार्तिक दोस्रो सातामा उपनिर्वाचन गर्ने तयारीस्वरूप मतदाता नामावली अद्यावधिक गर्न आह्वान गरेपछि आकांक्षीहरूले आ–आफ्नो पक्षमा माहोल बनाउने सक्रियता बढाएका छन्।

एमालेबाट खिमलाल भट्टराई सबैभन्दा अगाडि छन्। भट्टराईले पार्टी अध्यक्ष केपी शर्मा ओलीसँग हालै भेट गरी तस्वीर सार्वजनिक गरेपछि टिकट पक्का भएको चर्चा भए पनि एमाले रुपन्देही अध्यक्ष यज्ञ गैरेले अहिलेसम्म कुनै आधिकारिक निर्णय नभएको बताए। भट्टराईसँगै दधिराम न्यौपाने, शशि पौडेल, भरत पोखरेल र पूर्वमेयर हरि अधिकारी पनि उम्मेदवार बन्न इच्छुक छन्।

भट्टराईले २०७९ को आम निर्वाचनमा रुपन्देही–५ बाट टिकट माग्दा विवाद उत्पन्न भएको थियो। यसपटक उनले चुकाइएको टिकट प्राप्त गर्ने तयारी गरिरहेका छन्।

उम्मेदवार चयन कांग्रेसदेखि राप्रपासम्मको तयारी

नेपाली कांग्रेसभित्र प्रमोद यादव, रामचन्द्र ढकाल र भरत शाहको नाम चर्चामा छ। तर कांग्रेस सचिव हरि काफ्लेले कुनै आकांक्षीले औपचारिक रूपमा उम्मेदवारी दाबी नगरेको स्पष्ट पारे। प्रमोद यादव विगतमा रुपन्देही–४ मा उम्मेदवार थिए भने शाह र ढकाल पनि यसअघिका निर्वाचनमा अन्य क्षेत्रमा पराजित भएका थिए।

राप्रपाबाट दिवंगत दीपक बोहराका छोराहरू क्याप्टेन गौरव बोहरा र प्रज्ज्वल बोहरा तथा नातिनी स्वाती थापाको नाम चर्चामा छ। पार्टीभित्र स्वाती थापालाई युवा पुस्ताले अघि सार्न सक्ने सम्भावना देखिएको छ। राप्रपा प्रदेश अध्यक्ष प्रदीप उदयका अनुसार अन्तिम निर्णय सर्वसम्मतिले गरिनेछ।

रास्वपा रुपन्देही–३ लाई अत्यन्तै महत्वपूर्ण मानेर गृहकार्य गरिरहेको छ। पार्टी नेताहरूका अनुसार प्रतिकूल परिणाम हुने संकेत देखिए सरकारले चुनाव नै नगराउने जोखिमसमेत रहेको बुझिएको छ। २०७९ मा रास्वपाले समानुपातिकतर्फ १४ हजारभन्दा बढी मत पाएको थियो।

मधेशी मोर्चाको साझा उम्मेदवार खोजी

संघीय लोकतान्त्रिक मोर्चाले पनि रुपन्देही–३ लाई प्राथमिकता दिँदै साझा उम्मेदवार उतार्न छलफल गरिरहेको छ। मधेशी मतहरू प्रभावकारी रूपमा सदुपयोग गर्न सात वटा दल जुटेका छन्। राष्ट्रिय मुक्ति पार्टीका नेता केशव झाले छलफल जारी रहेको जानकारी दिए।

यसबीच नागरिक उन्मुक्ति पार्टीका अध्यक्ष रेशम चौधरीले आफ्ना उम्मेदवारलाई समर्थन गराउन प्रस्ताव गरे पनि सहमति जुटेको छैन। नेकपा एकीकृत समाजवादीका कमल भण्डारी वा स्वतन्त्र समूहसँग सहकार्य गरी साझा उम्मेदवार उतार्ने विषयमा समेत छलफल भइरहेको छ। बालेन शाह समर्थक समूह पनि सम्भावित उम्मेदवार खोजीमा जुटेको छ।

विगतको नतिजा : दलहरूको आधार कस्तो ?

२०७४ मा तत्कालीन एमालेका घनश्याम भुसाल विजयी भएका थिए भने २०७९ मा राप्रपाका दीपक बोहरा एमालेको समर्थनमा विजयी भए। पछिल्लो समानुपातिक मतअनुसार कांग्रेसले २० हजारभन्दा बढी मत पाएको छ भने एमालेले १६ हजार ९८६ मत पाएको छ। रास्वपा तेस्रो ठूलो मत पाएको पार्टी बनेको थियो।

रुपन्देही–३ मा शुद्धोधन, सिद्धार्थनगर, सियारी, ओमसतिया, मायादेवी, तिलोत्तमा र बुटवल उपमहानगरपालिकाका केही वडा समेटिएका छन्। यो क्षेत्र मधेशी समुदायको बाक्लो बसोबास रहेको क्षेत्र मानिन्छ। त्यसैले साझा उम्मेदवारको समीकरणले परिणाममा ठूलो असर पार्न सक्छ।

आगामी दिनमा उम्मेदवारहरूको टुङ्गो लागेपछि मात्र दलहरूको रणनीति प्रस्ट हुने देखिन्छ। यस क्षेत्रको उपनिर्वाचनको परिणामले आगामी २०८४ को आम निर्वाचनको समीकरणमा समेत प्रभाव पार्ने प्रक्षेपण गरिँदैछ।