भोजपुर — अरुण गाउँपालिका वडा नं. १, याङपाङमा सामाजिक सुरक्षा भत्ता वितरण तथा राष्ट्रिय परिचयपत्र विवरण संकलन कार्यक्रम सफलतापूर्वक सम्पन्न भएको छ। सेवामुखी र सामाजिक उत्तरदायित्वप्रति समर्पित स्थानीय शासनको प्रतिबद्धता झल्काउने सो कार्यक्रममा २२८ जना लाभग्राहीले सामाजिक सुरक्षा भत्ता प्राप्त गरेका छन् भने ४५ जनाले राष्ट्रिय परिचयपत्र विवरण संकलन सेवा लिएका छन्।

वडाध्यक्ष रामकुमार तामाङका अनुसार कार्यक्रम ज्येष्ठ नागरिक, अपाङ्गता भएका व्यक्ति र अशक्तहरूलाई लक्षित गरी सञ्चालन गरिएको हो। यस प्रकारको जनमुखी तथा संवेदनशील सेवा प्रवाहले सहभागीहरूमा सकारात्मक सन्देश प्रवाह गरेको तामाङले बताए।

कार्यक्रममा गाउँपालिका अध्यक्ष शालिकराम खत्री, कार्यपालिका सदस्य तथा वडा सदस्यहरू, प्रशासन शाखा प्रमुख श्यामकुमार राई, पञ्जीकरण शाखा प्रमुख चिन्तामणि पोखरेल, वडा सचिव, प्रभु बैंक प्याउली शाखा प्रमुख डिकपाल राई र जिल्ला प्रशासन कार्यालयका राष्ट्रिय परिचयपत्र दर्ता अपरेटर रोशन गुरागाईंको उपस्थिति रहेको थियो।

राष्ट्रिय परिचयपत्र नपाएका नागरिकलाई सरकारी सेवाबाट वञ्चित हुन नदिन आयोजना गरिएको यो कार्यक्रमले सेवा प्रणालीलाई अझ समावेशी, पहुँचयोग्य र नागरिकमैत्री बनाउने दिशामा टेवा पुर्‍याएको वडाध्यक्ष तामाङले जानकारी दिए।

स्थानीय तहको समन्वय, प्रशासनिक संयोजन र प्रविधिमैत्री सेवा प्रवाहको सफल उदाहरणका रूपमा प्रस्तुत भएको यस कार्यक्रमले सामाजिक सुरक्षा र नागरिक पहिचान सुनिश्चिततामा स्थानीय सरकारको सक्रियता र प्रतिबद्धता पुष्टि गरेको छ।